திருஞானசம்பந்தர் (திருவண்ணாமலை எல்லையில் பாடிய திருப்பதிகம்):

(1)
ஞானசம்பந்த மூர்த்தி விழுப்புரம் மாவட்டத்திலுள்ள அறையணிநல்லூர் எனும் தலத்தினைத் தரிசித்துப் போற்றி, அம்மலையினை வலமாக வந்து பணிகின்றார் (தற்கால வழக்கில் அறகண்டநல்லூர்). பின் அன்பர்கள் காட்ட, அங்கிருந்தவாறே சோலைகள் சூழ்ந்த திருவண்ணாமலையினைத் தரிசிக்கின்றார், 
-
(திருஞானசம்பந்தர் புராணம்: திருப்பாடல் 969):
சீரின் மன்னிய பதிகம் முன்பாடி அத்திருஅறையணிநல்லூர்
வாரின் மல்கிய கொங்கையாள் பங்கர் தம் மலைமிசை வலங்கொள்வார்
பாரின் மல்கிய தொண்டர்கள் இமையவர் நாடொறும் பணிந்தேத்தும் 
காரின் மல்கிய சோலைஅண்ணாமலை அன்பர் காட்டிடக் கண்டார்

(2)
அம்மலையானது அண்ணாமலைப் பரம்பொருளின் திருவுருவம் போன்று காட்சி தருதலைக் கண்களாரத் தரிசித்து, கைதொழுது, பெருகும் காதலுடன் 'உண்ணாமுலை உமையாளொடும்' எனும் அற்புதப் பாமாலையினைப் பாடியவாறே, தொண்டர்களும் உடன்வர, திருவண்ணாமலை திருத்தலத்தினைச் சென்றடைகின்றார்,
-
(திருஞானசம்பந்தர் புராணம்: திருப்பாடல் 970):
அண்ணாமலை அங்கமரர் பிரான் வடிவு போன்று தோன்றுதலும்
கண்ணால் பருகிக் கைதொழுது கலந்து போற்றும் காதலினால்
உண்ணாமுலையாள் எனும் பதிகம் பாடித் தொண்டருடன் போந்து
தெண்ணீர் முடியார் திருவண்ணாமலையைச் சென்று சேர்வுற்றார்
-
(திருவண்ணாமலை - ஞானசம்பந்தர் தேவாரம் - திருப்பாடல் 1)
உண்ணாமுலை உமையாளொடும் உடனாகிய ஒருவன்
பெண்ணாகிய பெருமான் மலை; திருமாமணி திகழ
மண்ணார்ந்தன அருவித்திரள்  மழலை முழவதிரும்
அண்ணாமலை தொழுவார் வினை வழுவா வண்ணம் அறுமே