திருஞானசம்பந்தர் (திருவதிகையில் பெற்ற திருநடனக் கோல தரிசனம்):

(1)
ஞானசமபந்த மூர்த்தி தலயாத்திரையாகச் செல்லும் வழியில் நடுநாட்டுத் தலமான திருவதிகையினைச் சென்றடைகின்றார். அப்பதி வாழ் மெய்த்தொண்டர்கள் எதிர்கொண்டு வணங்க, எதிர்தொழுதவாறே ஆலயத்துள் செல்கின்றார்,
-
(திருஞானசம்பந்தர் புராணம்: திருப்பாடல் 964):
...
மிக்க சீர்வளர் அதிகை வீரட்டமும் மேவுவார் தம்முன்பு
தொக்க மெய்த் திருத்தொண்டர் வந்தெதிர் கொளத் தொழுதெழுந்து அணைவுற்றார்

(2)
திருக்கருவறையில் எழுந்தருளியுள்ள வீராட்டனேஸ்வரப் பரம்பொருளின் திருமுன்பு சென்று தரிசிக்கையில், அதிகையுறை ஆதிமூர்த்தி திருநடக்கோலம் காட்டிப் பேரருள் புரிகின்றார் ('திருநடம் புலப்படும்படி காட்ட' என்பது தெய்வச் சேக்கிழார் வாக்கு). சீகாழிச் செல்வர் உளமுருகி ஒருமையுற்ற சிந்தையுடன் இறைவரைப் பணிந்து, 'குண்டைக்குறள் பூதம்' எனும் பாமாலையால் போற்றி செய்கின்றார்,
-
(திருஞானசம்பந்தர் புராணம்: திருப்பாடல் 965):
ஆதி தேவர் அங்கமர்ந்த வீரட்டானம் சென்றணைபவர் முன்னே
பூதம் பாட நின்றாடுவார் திருநடம் புலப்படும்படி காட்ட
வேத பாரகர் பணிந்துமெய் உணர்வுடன் உருகிய விருப்போடும்
கோதிலா இசை குலவு குண்டைக்குறள் பூதம் என்றெடுத்து ஏத்தி

(3)
திருக்கூத்தினைத் தரிசிக்கப் பெற்றமையால் ஒவ்வொரு திருப்பாடலின் இறுதியிலும் 'ஆடும் வீரட்டானத்தே' என்று குறித்து மகிழ்கின்றார் ஆளுடைப் பிள்ளையார்,
-
(திருவதிகை - திருஞானசம்பந்தர் தேவாரம் - திருப்பாடல் 1)
குண்டைக் குறள்பூதம் குழும அனலேந்திக்
கெண்டைப் பிறழ் தெண்ணீர்க் கெடில வடபக்கம்
வண்டு மருள்பாட வளர்பொன் விரிகொன்றை
விண்ட தொடையலான் ஆடும் வீரட்டானத்தே
-
(திருவதிகை - திருஞானசம்பந்தர் தேவாரம் - திருப்பாடல் 2)
அரும்பும் குரும்பையும் மலைத்த மென்கொங்கைக்
கரும்பின் மொழியாளோடுடன் கைஅனல் வீசிச்
சுரும்புண் விரிகொன்றைச் சுடர்பொற் சடைதாழ
விரும்பும் அதிகையுள் ஆடும் வீரட்டானத்தே