திருஞானசம்பந்தர் (திருமருகல் ஆலயக் கருவறையில் திருச்செங்காட்டங்குடி திருக்காட்சி):

(1)
சம்பந்தப் பெருமானார் தலயாத்திரையாக திருச்செங்காட்டங்குடியைச் சென்றடைகின்றார். சிறுத்தொண்ட நாயனார் மகிழ்வுடன் எதிர்கொள்ள, ஆலயத்துள் சென்று கணபதீஸ்வரப் பரம்பொருளைப் பணிந்தேத்துகின்றார். பின்னர் சிறுத்தொண்டரின் இல்லத்தில் சிறிது காலம் தொண்டர்களுடன் அன்பினால் கூடி மகிழ்ந்திருந்து, சிறுத்தொண்டரிடம் விடைபெற்று, திருமருகல் தலத்திற்குப் பயணித்துச் செல்கின்றார்.

(2)
திருமருகலில் மாணிக்கவண்ணப் பெருமானைப் போற்றி செய்து அப்பதியிலேயே சிறிது காலம் எழுந்தருளி இருக்கின்றார். அந்நாட்களில் ஆலயத்தருகில் பாம்பினால் மாண்ட வணிகனொருவனைத் திருவருளால் உயிர்ப்பித்து, அவனுக்கும் அவனுடன் வந்திருந்த சிவபக்தையான காரிகை ஒருத்திக்குமாய்த் திருமணம் செய்வித்து அருள் செய்கின்றார். 

(3)
இந்நிலையில் சிறுத்தொண்ட நாயனார் திருமருகலுக்குச் சென்று சீகாழிப் பிள்ளையாரிடம் 'நீங்கள் மீண்டும் எங்கள் பதியான செங்காட்டங்குடிக்கு எழுந்தருளி வருதல் வேண்டும்' என்று விண்ணப்பித்துக் கொள்கின்றார். உடன் சிவஞானப் பிள்ளையாருக்குச் செங்காட்டங்குடி மேவும் உத்திராபதீஸ்வரப் பரம்பொருளை மீண்டுமொரு முறை தரிசித்துப் போற்றும் ஆர்வம் பெருகுகின்றது. மருகல் இறைவரின் அருளைப் பெற்றுவர ஆலயத்துள் செல்கின்றார்,
-
(திருஞானசம்பந்தர் புராணம்: திருப்பாடல் 484):
மற்றவர்க்கு விடைகொடுத்தங்கு அமரு நாளில்
   மருகல் நகரினில்வந்து வலிய பாசம்
செற்றபுகழ்ச் சிறுத்தொண்டர் வேண்ட மீண்டும்
   செங்காட்டங்குடியில் எழுந்தருள வேண்டிப்
பற்றியெழும் காதல்மிக மேன்மேல் சென்று
   பரமனார் திறத்துன்னிப் பாங்கரெங்கும்
சுற்றும் அருந்தவரோடும் கோயிலெய்திச்
   சுடர்மழு ஆண்டவர்பாதம் தொழுவான் புக்கார்

(4)
திருக்கருவறையில் மருகலுறை முதல்வர் 'கணபதீஸ்வரத்தில் எழுந்தருளியுள்ள திருக்கோலத்தினை' விளக்கமாகக் காட்டியருள் புரிகின்றார்,
-
(திருஞானசம்பந்தர் புராணம்: திருப்பாடல் 485):
புக்கிறைஞ்சி எதிர்நின்று போற்றுகின்றார்
   பொங்குதிரை நதிப்புனலும் பிறையும் சேர்ந்த
செக்கர்முடிச் சடைமவுலி வெண்ணீற்றார் தம்
   திருமேனி ஒருபாகம் பசுமையாக
மைக்குலவு கண்டத்தார் மருகல் கோயில்
   மன்னுநிலை மனம்கொண்டு வணங்குவார்முன்
கைக்கனலார் கணபதீச்சரத்தின் மேவும்
   காட்சி கொடுத்தருளுவான் காட்டக் கண்டார்

(5)
காழிப் பிள்ளையார் கண்ணருவி பொழிய, அளப்பரிய காதலுடன் அம்பிகை பாகனாரின் திருவருளை வியந்து, 'மருகலுறை ஆதியே! நீ இவ்விதமாய் கணபதீஸ்வரத் திருக்கோலத்தில் காட்சி அளித்தருள்வது எதன் பொருட்டு ஐயனே?' என்று உளமுருகப் பாடிப் பரவுகின்றார்,  
-
(திருமருகலும் திருச்செங்காட்டங்குடியும் - திருஞானசம்பந்தர் தேவாரம் - திருப்பாடல் 1)
அங்கமும் வேதமும் ஓதும்நாவர்; அந்தணர் நாளும் அடிபரவ
மங்குல் மதிதவழ் மாடவீதி மருகல் நிலாவிய மைந்த சொல்லாய்
செங்கயலார் புனல் செல்வமல்கு சீர்கொள் செங்காட்டங்குடி அதனுள்
கங்குல் விளங்கெரி ஏந்தியாடும் கணபதியீச்சரம் காமுறவே

(6)
இவ்வாறாக இறைவரின் அருளைப் பெற்றுச் சிறுத்தொண்டருடன் திருச்செங்காட்டங்குடி பதிக்கு மீண்டும் எழுந்தருளிச் சென்று, அங்கு சிறிது காலம் தங்கியிருந்து, மதி சூடும் அண்ணலாரை முப்போதும் போற்றி வருகின்றார்.