திருஞானசம்பந்தர் (திருவாரூர் தல யாத்திரை - ஆலயம் அடையுமுன்பே பாடிய 4 திருப்பதிகங்கள்)

ஆரூரிலிருந்து புகலூருக்கு எழுந்தருளி வரும் அப்பர் சுவாமிகளைப் புகலூர் எல்லையிலேயே சென்று சம்பந்தப் பிள்ளையார் எதிர்கொள்ள, இரு அருளாளர்களும் வணங்கி மகிழ்கின்றனர். சுவாமிகளின் வாயிலாக ஆரூரின் சிறப்பினைக் கேட்கப் பெறும் சீகாழிப் பிள்ளையாருக்கு ஆரூரின் பால் அளவிலாத ஆர்வம் பெருகுகின்றது. அடிகளைப் புகலூரில் எழுந்தருளி இருக்குமாறு விண்ணப்பித்து, தொண்டர்களோடு ஆரூருக்கு அக்கணமே யாத்திரை மேற்கொள்கின்றார். 

(1)
வழியில் திருவிற்குடி தலத்தினைத் தரிசித்துப் பின்னர், 'பாடலன் நான்மறை' எனும் ஆரூர்ப் பனுவலைப் பாடியவாறே பயணித்துச் செல்கின்றார்,
-
(திருவாரூர் - ஞானசம்பந்தர் தேவாரம் - திருப்பாடல் 1)
பாடலன் நான்மறையன்; படிபட்ட கோலத்தன்; திங்கள்
சூடலன்; மூவிலைய சூலம் வலனேந்திக்
கூடலர் மூவெயிலும் எரியுண்ணக் கூரெரி கொண்டு, எல்லி
ஆடலன்; ஆதிரையன்; ஆரூர் அமர்ந்தானே

(2)
ஆரூரின் எல்லையை நெருங்குகையில், அப்பதி பொன்னுலகு போல் சிறப்புற்று விளங்குவதைக் கண்டு பெருமகிழ்வுற்று, 'பருக்கையானை மத்தகத்து' எனும் பாமாலையை அருளிச் செய்து, திருப்பாடல்கள் தோறும் அந்நகரின் சிறப்புகளைப் பட்டியலிட்டு 'அந்தண் ஆரூர் என்பதே' என்று போற்றி, தொண்டர்களோடு பாடிஆடியவாறே மேலும் முன்னேறிச் செல்கின்றார்,
-
(திருவாரூர் - ஞானசம்பந்தர் தேவாரம் - திருப்பாடல் 1)
பருக்கையானை மத்தகத்து அரிக்குலத்து உகிர்ப்புக
நெருக்கிவாய நித்திலம் நிரக்குநீள் பொருப்பன்ஊர்
கருக்கொள் சோலை சூழநீடு மாட மாளிகைக் கொடி
அருக்கன் மண்டலத்து அணாவும் அந்தண் ஆரூர் என்பதே

(3)
நகருக்குள் செல்லுகையில், நமையெல்லாம் ஆரூரை வழிபட ஆற்றுப்படுத்தும் விதமாய், 'சித்தம் தெளிவீர்காள்' எனும் திருஇருக்குக்குறள் திருப்பதிகத்தினை அருளிச் செய்கின்றார்,
-
(திருவாரூர் - திருஇருக்குக் குறள் - ஞானசம்பந்தர் தேவாரம் - திருப்பாடல் 1)
சித்தம் தெளிவீர்காள்; அத்தன் ஆரூரைப்
பத்தி மலர் தூவ முத்தியாகுமே

(4)
ஆரூர் வாழ் திருத்தொண்டர்கள் நகர் முழுவதையும் பெருஞ்சிறப்புடன் அலங்கரித்துச் சீகாழி அண்ணலாரை எதிர்கொண்டு வணங்க, பிள்ளையாரும் அவர்களை எதிர்வணங்கி மகிழ்ந்து, அந்நிலையிலேயே 'ஆரூருறைப் பரம்பொருள் எளியேனை ஏற்றுக் கொள்வாரோ?' என்று வினவுமுகமாக 'அந்தமாய்' எனும் பாமாலையை அருளிச் செய்கின்றார், 
-
(திருவாரூர் - ஞானசம்பந்தர் தேவாரம் - திருப்பாடல் 1)
அந்தமாய் உலகுஆதியும் ஆயினான்
வெந்த வெண்பொடிப் பூசிய வேதியன்
சிந்தையே புகுந்தான் திருவாரூர்எம்
எந்தை தான்எனை ஏன்றுகொளும் கொலோ

(இவ்வாறாக திருவாரூர் ஆலயத்துள் புற்றிடங்கொண்ட புராதனரைத் தரிசிக்கும் முன்னரே நம் சம்பந்தப் பிள்ளையார் ஆரூருக்கு 4 திருப்பதிகங்களை அருளிச் செய்துள்ளார் எனில் அப்பதியின் அளப்பரிய சீர்மையினை விளக்கவும் ஒண்ணுமோ?)