திருஞானசம்பந்தர் (திருவியலூரில் பெற்ற திருக்காட்சி):

(1)
ஞானசம்பந்த மூர்த்தி கஞ்சனூர்; மாந்துறை; திருமங்கலக்குடி முதலிய தலங்களைத் தரிசித்துப் போற்றியவாறே, தஞ்சை மாவட்டத்தில்; காவிரியின் வடகரையிலுள்ள திருவியலூரைச் சென்று சேர்கின்றார் (தற்கால வழக்கில் திருவிசநல்லூர்). இங்கு சிவபரம்பொருள் யோகானந்தீஸ்வரர்; புராதனேஸ்வரர்; வில்வாரண்யேஸ்வரர் எனும் திருநாமங்களிலும், உமையன்னை சாந்தநாயகி; சௌந்தர நாயகி எனும் திருப்பெயர்களோடும் எழுந்தருளி இருக்கின்றனர். சடாயு பூசித்துப் பேறு பெற்றுள்ள திருத்தலம்.

(2)
சீர்காழிச் செல்வர் இறைவரின் திருமுன்பாகச் சென்று பணிந்து, 'குரவம்கமழ்' எனும் பாமாலையால் ஆதிமூர்த்தியைப் போற்றி செய்யத் துவங்குகின்றார், 

(திருவியலூர் - ஞானசம்பந்தர் தேவாரம் - திருப்பாடல் 1)
குரவம்கமழ் நறுமென்குழல் அரிவைஅவள் வெருவப்
பொருவெங்கரி படவென்றதன் உரிவை உடலணிவோன்
அரவும் மலைபுனலும் இளமதியும் நகுதலையும்
விரவும்சடை அடிகட்கிடம் விரிநீர் வியலூரே

(3)
ஆளுடைப் பிள்ளையார் உளமுருகப் பாடுகையில், கருவறையுள் யோகானந்தீஸ்வரப் பரம்பொருள் நேரில் எழுந்தருளித் தோன்றுகின்றார், ('அங்கண் அமர்வார் தம்முன்னே அருள்வேடம் காட்ட' என்றிதனைத் தெய்வச் சேக்கிழார் பதிவு செய்கின்றார்),

(திருஞானசம்பந்தர் புராணம் - திருப்பாடல் 294)
வெங்கண் விடைமேல் வருவார் வியலூர் அடிகளைப் போற்றித்
தங்கிய இன்னிசை கூடும் தமிழ்ப்பதிகத் தொடை சாத்தி
அங்கண் அமர்வார் தம்முன்னே அருள்வேடம் காட்டத் தொழுது
செங்கண் மாலுக்கு அரியார்தம் திருந்துதேவன்குடி சேர்ந்தார்

(4)
சீகாழி அண்ணலார் 5ஆம் திருப்பாடலில் 'கண்ணார் தரும் உருவாகிய கடவுள் இடம்' என்று இறைவர் திருக்காட்சி அளித்தருளிய பேரருள் திறத்தினை வியந்து போற்றுகின்றார்,

(திருவியலூர் - ஞானசம்பந்தர் தேவாரம் - திருப்பாடல் 5)
எண்ணார்தரு பயனாய்; அயன்அவனாய்; மிகு கலையாய்ப்
பண்ணார்தரு மறையாய்; உயர் பொருளாய்; இறை அவனாய்க்
கண்ணார் தரும் உருவாகிய கடவுள் இடம் எனலாம்
விண்ணோரொடு மண்ணோர் தொழும் விரிநீர் வியலூரே